معلومات عن المدينة الجامعية ، يبحث الكثير من الطلاب علي معلومات عن المدينة الجامعية وشرط قبولهم في المدينة الجامعية وهل فعلاً كل طالب بيقدم بيتقبل ولاايه ، طب هل بتفرق لو مكاني بعيد عن المدينة ولاقريب ولاايه ، وعلي فكرة الاسئلة كتيرة جداً لو قلت جميع الأسئلة لن يكفيني صفحات كثيرة ، ولكن اختصرنا الموضوع علي ان احنا انقولك كل المعلومات الكافية واتلاقي إجابة لكل سؤال بيدور في ذهنك .
عزيزي الطالب صاحب المقام الرفيع ، قبل متعرف شروط قبولك في المدينة الجامعية خاصة لو انت لسه طالب مستجد ولسه داخل الفرقة الاولي من أي كلية لابد أن تعرف ماهي فعلاً المدينة الجامعية .
المدينة الجامعية هو مكان حكومي خاص بالطلاب يأكلو فيه ويشربوا فيه ويناموا فيه ومن وجهة نظري أفضل من السكن الخارجي ، لأن حضرتك أتلاقي هناك رعاية وأمان حتي في الأكل ، الأكل مضمون وكاشف عليه أفضل الدكاترة ، أما في السكن الخارجي أنت بتشتري الأكل من المطاعم وطبعاً لو اتكلمنا عن المطاعم حدث ولاحرج .
وعشان تبقي وأخد بالك أيها الطالب المحترم انك في المدينة اتلاقي مايقرب من ثلاثة أرباع الطلاب هم طلاب متفوقون وانت طبعاً لما اتلاقي مكان معظمه طلاب مجتهدون محترمون ايبقي حافز ليك علي المذاكرة والجد والاجتهاد .
ولازم تبقي مركز معايا شوية ان السكن الجامعي بمواعيد سواء في الأكل أو النوم بتختلف من جامعة لجامعة يعني أنا علي سبيل المثال لاالحصر في جامعة المنيا كنت بأكل في المطعم الساعة واحدة ظهرا ، المطعم بيبقي من 12 إلي 5 المغرب يعني أحسن حاجة ليك انك تكسب وقتك .
طب والنوم قلنالكم فوق علي حسب كل جامعة بس في جامعة المنيا وده علي فكرة في أغلب الجامعات اخرج زي ما أنت عايز براحتك بس أخرك في الوقت علشان بيقفلوا البوابة الساعة 11 بالليل طب افرض أخرت مثلاً أيدخلوني ولالع ، بص أيدخولك بس أيدخلولك انظار ولو تكرر الانظار أكثر من مرة ممكن يتم فصلك .
وفي حاجة كنت انسي أذكرها لك عزيزي القارئ في حضور وغياب في المدينة بيبقي بعد العشاء كده مشرف بيلف علي كل غرفة وبيشوف الغياب طب هنا طالب أيقول أنا عندي مشكلة في هذه النقطة ، طب لوعندي أي مناسبة وحبيت أغدار المدينة لمدة يوم أو أسبوع مثلاً في الحالة دي انضر ولاايه ، انت في الحالة دي اتعمل جواب انصراف بطريقة سهلة جداً في كل مبني اتلاقي واحد قاعد علي مكتب معاه دفتر اتقوله عايز اعمل جواب انصراف ايقولك خد اكتب اسمك الموضوع ده بيأخذ أقل من دقيقة متقلقش وبعد كده غادر زي ما أنت عايز ومش اتتاخد غياب
ولو حد سألني علي مكونات الغرفة أقولك مكونات المدينة كلها ، المدينة عبارة عن مباني كل مبني له رمز زي أ ب ج أي رمز وهذا المبني مخصص لكليات بعينها زي مثلا المبني ب يخص كلية حقوق واداب والمبني د يخص طب وألسن وخلي بالك اتلاقي مبني كامل يخص طلاب الامتياز الناس اللي في أي كلية اللي جايبة امتياز بتخش هذا المبني أكانك في فندق سبع نجوم والله بدون مبالغة .
أما المبني الواحد مقسم لأكثر من طبقة يبقي فيه مثلاً 4 أدوار الدور الواحد فيه مايقرب من خمسين غرفة علي دورة مياء واحدة في الدور الواحد طب اللي يخص الطالب أكتر في هذا الحوار معلومات عن الغرفة مثلاً بص الغرفة بتبقي مرقمة بأرقام زي 100 و 200 و 300 مثلاً ووكل غرفة فيها سرير لكل طالب ومكتب وكرسي خاص به بتبقي عهدة في رقبته بيسلمها بعد انتهاء الدراسة ، ولو طالب سأل وقال هو كام أصلاً عدد الطلاب الموجودين في الغرفة أقولك الإجابة سهلة ، قبل ظهور كورونا كان كل غرفة فيها 4 طلاب ولكن بعد انتشار الفيروس كل غرفة فيها طالبين فقط لدواعي أمنية حفظاً علي سلامة الطلاب .
وأخيراً عزيزي الطالب أحب أقولك شروط قبولك في المدينة الجامعية :
1ـ بتقدم علي الموقع الخاص بالجامعة بتاعتك ، كل جامعة لها موقع خاص بالمدينة الجامعية ، كل اللي عليك انك بتخش علي الموقع وتملأ بياناتك زي الاسم والسن والعنوان وهكذا ومن خلال هذا الموقع انت طبعاً بتعرف بعد كده النتيجة .
2ـ تكون ناجح في الثانوية العامة أو الدبلوم وجايب تقدير الكلية اللي أنت حابب تخشها ، ولو أنت طالب في الجامعة أصلاً يشترط لقبولك ألايقل تقديرك عن جيد ، طب افرض واحد جاب لا قدر الله مقبول في هذه الحالة لن يتم قبولك بس أحب أقولك شد حيلك وأت في السنين القادمة وأت تقديرات عالية علشان فرصتك في القبول تكون كبيرة .
3ـ يكون مجموعك عالي في الثانوية العامة أو الدبلوم يعني مثلاً لو كلية الحقوق بتقبل من 80 تبقي جايب مثلاً 86 علشان يقبلوك علي طول أبسطهالك أكتر من كده اللي جايب 83 فرصته في القبول أقل من اللي جايب 86 اللي حصل علي 86 له الأولوية ونفس الكلام للطلاب الجامعيين القدماء اللي جايب امتياز فرصته في القبول أكتر من اللي جايب جيد جداً وهكذا .
4ـ يكون سنك صغير يعني متكنش راسب سواء في الثانوية أو الجامعة ، اللي سنه صغير له الأولوية عن اللي سنه كبير .
5ـ يكون بيتك بعيد عن جامعتك ودي حاجة بديهية جداً ، فلو سألتك سؤال وقلتلك شخص من أسوان وفي جامعة القاهرة وشخص من الجيزة وبرضو في جامعة القاهرة من له الأولوية في هذه الحالة طبعاً انت اتقول الشخص المغترب ، يبقي اللي مكانه بعيد له الأولوية عن اللي مكانه قريب .
6ـ تكون سمعتك حسنة ياعزيزي الطالب سواء في الثانوية أو الجامعة .
ونتمني لكم التوفيق والسداد وربنا يوفقكم جميعاً إلي مايحبه ويرضي .
تعليقات
إرسال تعليق